የሕዝብ ተወካዮች ምክር ቤት የራሱ የሆነ የቴሌቪዥንና የሬዲዮ ማሠራጫ እንዲኖረው ሊደረግ ነው።

0
125

የሕዝብ ተወካዮች ምክር ቤት የራሱ የሆነ የቴሌቪዥንና የሬዲዮ ማሠራጫ እንዲኖረው ለማድረግ የጽሕፈት ቤቱን ማቋቋሚያ አዋጅ ሊያሻሽል ነው።
ይህንንም ዕውን ለማድረግ የሕዝብ ተወካዮች ምክር ቤት ጽሕፈት ቤት ማቋቋሚያ አዋጅን ለማሻሻል ረቂቅ አዋጅ ታኅሳስ 2 ቀን 2011 ዓ.ም. ለምክር ቤቱ መደበኛ ስብሰባ ቀርቦ ውይይት ከተካሄደበት በኋላ፣ ለተጨማሪ ዝርዝር ዕይታ ለሰው ሀብትና ቴክኖሎጂ ጉዳዮች ቋሚ ኮሚቴ ተመርቷል።
የረቂቅ አዋጁን ይዘት በተመለከተ ማብራሪያ የሰጡት አፈ ጉባዔ አቶ ታገሰ ጫፎ ሲሆኑ፣ የምክር ቤቱ የሚዲያ ፍላጎት ከጊዜ ወደ ጊዜ እየጨመረ መምጣቱን ጠቁመዋል፡፡ ምክር ቤቱ የሕዝብ ተደራሽነትን ለማስፋት የተለያዩ የመገናኛ አማራጮችን በተቀናጀና ውጤታማ በሆነ መንገድ መጠቀሙ አስፈላጊ እንደሆነ ገልጸዋል።
የህንድና የደቡብ አፍሪካ ፓርላማዎች የራሳቸው የቴሌቪዥን ጣቢያ በማቋቋም ለሕዝባቸው በተሻለ ሁኔታ ተደራሽ መሆን እንደቻሉ፣ ከቴሌቪዥን በተጨማሪ የኅትመትና የተለያዩ የማኅበራዊ ሚዲያዎችን መጠቀም በተለያዩ አገሮች የተለመደ የፓርላማዎች የሕዝብ ግንኙነት ዘዴ መሆኑን ያብራሩት አፈ ጉባዔው፣ ይህንን ተሞክሮ ወደ ኢትዮጵያ ማምጣት ተገቢ በመሆኑ የምክር ቤቱ ጽሕፈት ቤት ማቋቋሚያ አዋጅን በማሻሻል የሕግ ማዕቀፍ እንዲኖረው ረቂቁ ከተዘጋጀበት ምክንያት አንዱ እንደሆነ አስረድተዋል።
በዚህ መሠረት የምክር ቤቱን ሥልጣንና ተግባር የሚመለከቱ ጉዳዮችን በተመለከተ ዜናዎችንና መዋዕለ ዜናዎችን በማሰባሰብ፣ በማዘጋጀትና የተለያዩ ፕሮግራሞችን በመቅረፅ በቴሌቪዥንና በሬዲዮ የማሠራጨት ሥልጣን የምክር ቤቱ ጽሕፈት ቤት እንዲኖረው ማሻሻያ አንቀጽ በማቋሚያ አዋጁ ላይ እንዲካተት ቀርቧል።
በተጨማሪም ጽሕፈት ቤቱ በተለያዩ ጉዳዮች ላይ ጥናቶችንና ምርምሮችን በማድረግ፣ ምክር ቤቱን የማማከር አገልግሎት እንዲሰጥ በረቂቅ ማሻሻያው ተመልክቷል።
ጽሕፈት ቤቱ ከዋና ጸሐፊው በተጨማሪ ሌሎች ሦስት ምክትል ዋና ጸሐፊዎች እንዲኖሩት በረቂቁ የተካተተ ተጨማሪ አንቀጽ ሲሆን፣ የዚህ አስፈላጊነት ያልታያቸው የምክር ቤቱ አባላት ጥያቄ አንስተዋል።
በተጨማሪም የጽሕፈት ቤቱ ሠራተኞችን ደመወዝና ጥቅማ ጥቅም ከሲቪል ሰርቪስ ወጥቶ በምክር ቤቱ የሚወሰን፣ የራሱ መዋቅርና የደመወዝ ስኬል እንዲኖረው ማሻሻያ ቀርቧል።

LEAVE A REPLY

Please enter your comment!
Please enter your name here